Pleno VGO

Pleno VGO

Alternativa democrática á Tiranía no Concello de Vigo

        

  

É certo que a cidadanía votou Abel Caballero e ninguén pode cuestionar a súa maioría absoluta, o que sí podemos e debemos cuestionar son certas formas absolutistas na toma de decisións e mesmo nos regulamentos internos do Concello que son causa de moitos sinsabores para aqueles que precisan dunha xestión verdadeiramente democrática (é dicir, unha xestión na que os dereitos sexan iguais para todos, e todos teñamos oportunidade de denunciar un mal funcionamento das Institucións sen ter que pagar avogados e procuradores para algo que é de sentido común resolver falando!)

Así nace esta iniciativa cidadá que imos chamar #PlenoVGO e imos probar se Twitter serve para algo máis que rechouchiar frustracións colectivas. Non me gusta nada a vida nas redes sociais, pero debemos recoñecer que medio mundo habita nelas, e quixeramos sacarlle certa utilidade democrática. Aproveitando a súa horizontalidade (en principio na rede calquera pode falar, e ninguén ten a vara de mando para facer calar!) quixeramos convidar a tódolos que consideren que a súa voz non está a ser verdadeiramente representada nas Institucións a falar nestes Plenos Virtuais.

O uso dunha única etiqueta (hashtag) pode chegar lonxe se tódolos participantes empregamos estas etiquetas de xeito intelixente: #PlenoVGO  #Vigo  #Galicia (ou calesquera outras que se irán acordando nos propios fíos desta inciativa)

Dez anos atrás creamos un grupo chamado VigoDenuncia nunha rede fotográfica Flickr (non demasiado popular) e tódolos meses enviamos informe vía e-mail ao Pleno do Concello de VGO.

Nin que decir ten que o resultado foi sempre o silencio espeso. Nin goberno nin oposición tiveron a ben considerar as denuncias subidas ás páxinas de VigoDenuncia.

Logo tentamos chegar vía Twitter e facer máis visibles as denuncias colgadas no grupo, pero este ano 2019 coa aplastante maioría absoluta do Caudillo Local, bloquearon a conta supoñemos que para impedir a difusión das denuncias (Abel Caballero e Carmela Silva puxéronse dacordo para bloquear e silenciar a palabra da cidadanía!)

Cremos na liberdade de expresión como dereito fundamental en calquera sistema democrático, cremos tamén na liberdade de información como garante da transparencia que fai posible a gobernanza amable das cuestións que afectan ao común.

A primeira queda cercenada ao bloquear as contas dos “disidentes” a segunda -a liberdade de información- está a ser corrompida vía subvencións aos grandes medios de comunicación (Faro de Vigo, La Voz de Galicia, TeleVigo...) que en plena pandemia activaron prácticas neoliberais, coma os “muros de pago” (que restrinxen aínda máis o acceso á información!)

En resumo: tentamos influir no bo goberno da cidade, pero estamos illados ou perdidos nas redes sen que a nosa voz teña un lugar público, aberto á participación de todos!

Os partidos políticos teñen outros intereses (escanos, cargos públicos, etc.) Invitamos aos partidos políticos ao debate público vía #PlenoVGO pero quede claro que ninguén poderá bloquear o que non lle guste... e no caso de que suceda, a asamblea soberana poderá votar o ostracismo da persoa que sexa denunciada por prácticas antidemocráticas!

Aquí o ostracismo tería máis repercusión que unha condena do Supremo; no caso de que alguén solicite votación de OSTRACISMO o cidadán mantén o dereito fundamental a se defender ante todos, pero se logo dun tempo prudencial (poñamos 3 meses) a asamblea soberana vota por ampla maioría (60%) impoñer a condena ao ostracismo (dez anos fóra da polis na Atenas de Pericles!) todos estaríamos comprometidos a “bloquear” a conta da persoa en cuestión !

Digamos que o proxecto é horizantal, aberto, libre, sen compromisos de ningún tipo, e busca únicamente un consenso cidadán disposto a mover o bo goberno da institución pública que nos pertence a todos por igual, voten o que voten e pensen o que pensen!

Quixeramos que fose un lugar onde a palabra e os argumentos venzan e convenzan e non os tícs autoritarios que estamos a padecer.

Teremos éxito na medida das nosas forzas e do tempo que sexamos quen de empregar para argumentar, propoñer e publicar emendas e proxectos que precisamos levar adiante nunha cidade viva e aberta!

Como sabemos que non debemos agardar resposta algunha da Institución, sería a propia rede mediante as etiquetas #PlenoVGO e outras asociadas a que se encargaría de manifestar a indignación (non cremos en absoluto nos trending topic, nin os buscamos, nin son necesarios, pero algunhas persoas os necesitan coma o aire que respiran: Abel Caballero e Carmela Silva) 

O proxecto quere ser camiño democrático para facer chegar a nosa voz máis lonxe e, de paso, ir tecendo unha verdadeira Rede Social Cidadá, xa non virtual, senon corpórea que volva encher as prazas públicas nas que compartir a vida!) 

*Nota sobre anonimato :

As “listas negras” son unha práctica habitual do mal goberno da cidade. Estas malas artes son empregadas por algúns para silenciar ao mensaxeiro! Así lonxe do tópico de que o anonimato é contraproducente, valoramos o dereito á propia imaxe e á liberdade de expresión que poderían verse coartadas baixo unha identidade pública onde as persoas sexan sinaladas polo sempiterno delator infiltrado. Para garantir a máxima liberdade respectamos escrupulosamente o anonimato deste proxecto cidadá.

É cousa de cada quén decidir como quere intervir no espazo público: tanto nos tén que veñas con burka ou espida, o que importa é tratar os temas e buscarlle solucións, o resto queda para a burocracia de partidos, asociacións e sectas de todo tipo que precisan DNI e Telefone...

Democracia Telefónica.  No Gracias !